По европскиот предизвик и успешниот почеток на европската приказна, ракометарите на Охрид, без поголеми потешкотии се вратија на домашната сцена и запишаа убедлива победа над Прилеп со 34-18.
Од самиот почеток беше јасно кој ќе го контролира натпреварот. Гостите поведоа со 4-1, а потоа и со 5-2, поставувајќи темпо кое домашниот тим не успеа да го следи. Новите засилувања, Томислав Јагуриновски и Младен Крсманчиќ, веднаш се впишаa во победничкиот ритам, а веќе по првите 30 минути резултатот 19-10 ја најави конечната разлика.
Во продолжението, избраниците на Борис Ројевиќ продолжија во ист стил – дисциплинирано и ефикасно. Разликата се движеше и до +15, а охриѓани рутински ја приведоа средбата до крај.
Меѓу најрасположените стрелци, во таборот на Охрид, беа Савревски со 7 голови, Кукуловски со 6 и Ѓукиќ со 5 погодоци, додека кај прилепчани се истакна Шабановиќ со четири реализации.
Во следното коло, Охрид ќе биде домаќин на Куманово, додека Прилеп ќе патува во Кавадарци, каде го очекува дуел со Тиквеш.
