Македонската ММА шампионка Даниела Алексовска го заокружи настапот на Светското првенство во Тбилиси, Грузија со нов медал за Македонија. Таа успеа да се пласира меѓу најдобрите три во својата категорија до 52.2 кг и да освои бронзен медал.
Во полуфиналната борба Алексовска влезе мотивирано и ја започна борбата поагресивно од својата противничка. Уште во првата рунда таа погоди со повеќе чисти удари и ја презеде иницијативата. Сепак, во втората рунда Азербејџанката Нармин Алијева ја искористи својата шанса и со вешт зафат успеа да ја принуди нашата натпреварувачка да се предаде.
И покрај поразот, Алексовска уште еднаш покажа дека припаѓа во самиот врв на светската ММА сцена. Со овој освоен медал таа ја збогати својата колекција на медали, во која веќе се наоѓа и златото од Европското првенство во февруари оваа година, како и бронзата од Светското првенство во Узбекистан во 2023.
Со вакви борбени настапи и високи резултати, Алексовска се наметнува како едно од најголемите имиња во македонските боречки спортови и мотив за идните генерации спортисти.
