Тренерот на Работнички Скопје и помошник селектор во женската сениорска репрезентација на Македонија, Душко Деспотовски, беше единствениот македонски претставник на шесттата „Тренерска конвенција“ што од 26 до 28 септември се одржа во Задар, во организација на Европската одбојкарска конфедерација (ЦЕВ).
Конвенцијата беше посветена на работа со младите категории, а како предавачи се појавија врвните стручњаци Ерик Хоџсон, Сашка ван Хинтум и Наталија Климентова. Учесниците имаа можност да следат теоретски предавања, практични тренинг сесии, како и специјализирани работилници за размена на искуства и примена на нови иновативни методи во тренинг процесот.
„Тренерската конвенција“ е дел од големиот проект на ЦЕВ „Играј одбојка – расти со неа“, во кој се вклучени 30 национални федерации од Европа, меѓу кои и Одбојкарската федерација на Македонија.
