Судиската организација на Одбојкарската федерација на Македонија (ОФМ) викендов успешно го реализираше редовниот годишен семинар за судии и делегати, кој се одржа во Охрид.
Семинарот беше дел од подготовките за новата натпреварувачка сезона 2025/26, а главен предавач беше ФИВБ-инструкторот Зорица Бјелиќ. Таа одржа стручни предавања со акцент на петте промени во правилата на одбојката, кои ќе стапат на сила од оваа сезона.
За оваа едукација, Судиската организација и ОФМ упатија покана и до домашните тренери, со цел подобро усогласување и соработка меѓу судиите и стручните штабови, но одзивот на тренерите беше под очекувањата.
Семинарот донесе и освежување во судиските редови – дури 12 нови кандидати успешно ги поминаа тестирањата и ќе дебитираат како судии во сезоната што претстои. Покрај предавањата, задолжително беше и полагањето на писмени тестови, без кои не може да започне сезоната.
Членовите на Судиската организација кои го пропуштија семинарот ќе подлежат на санкции, согласно одлуката на Претседателството на СО.
