По две години пауза од активно играње, искусниот Дејан Блажевски реши да се врати на фудбалските терени и повторно да го облече дресот на клубот во кој остави силна трага – Хоризонт Турново.
Популарниот „Шиле“ се враќа со јасна цел – да му помогне на тимот да стане шампион во Трета лига – Исток и преку бараж натпреварите да избори враќање во Втората лига.
39-годишниот Блажевски е добро познато име на македонската фудбалска сцена. Во домашното првенство ги бранеше боите на Вардар, Скопје, Хоризонт Турново, Пелистер и Работнички, додека во странство настапуваше за ПАЕ Вериа и Пиерикос (Грција), Хазар Ланкаран (Азербејџан) и Тирана (Албанија).
Тој веќе го имаше своето деби за Хоризонт Турново во дуелот со Дојранско Езеро во Дојран. Поранешниот вицешампион на Македонија славеше со 2:3 – резултат за кој веќе информираше Спортска Мрежа во прегледот на колото.
Блажевски повторно ја носи капитенската лента, а на својот кам-бек ги одигра сите 90 минути за Турново.
