Во третиот натпреварувачки ден од турнирот „Крсте Андоновски“ во Охрид, се сретнаа екипите на Тримо Требње од Словенија и Динамо Панчево од Србија. Бевме сведоци на еден возбудлив и интересен натпревар со многу пресврти сè до крајот. Иако Динамо успеа да се врати повеќе пати во текот на мечот, сепак на крај славеа гостите од Словенија со резултат 30:28.
Голманот од таборот на Тримо, познатиот Урбан Лесјак, кој е добро познат на македонската ракометна публика по тоа што го носеше дресот на Еурофарм Пелистер минатите сезони, во изјава за Спортска мрежа упати честитки до организаторите на турнирот и истакна дека сите осум екипи тука се одлични:
„Најпрво би сакал да им честитам на организаторите што успеаја на вакво ниво да соберат осум одлични екипи од овие простори, па и пошироко- имаме екипа дури од Фарски Острови..така што им упатувам честитки и голема почит“, изјави Лесјак во ексклузивна изјава за Спортска Мрежа.
Исто така, се надева дека со својот нов тим, ќе успеат да го освојат турнирот во Охрид и ќе играат во финалето во сабота.
„Секој натпревар тука е тежок, напорен.. како што кажав, сите екипи се добри, а не можеш добро да одмориш. Па така, веќе утре нè чека нов предизвик, се надевам на победа и се надевам дека ќе играме што подоцна во сабота“, вели словенечкиот голман за Спортска Мрежа.
