Двократниот шампион Струга Трим Лум продолжи со одличниот старт на сезоната во Првата македонска фудбалска лига, славејќи со 1-2 на гостувањето кај новајлијата Арсими 1973 во Гостивар.
Дебитантот во елитата одигра солидно прво полувреме и во 42. минута дојде до водство – Нигериецот Олатунбосун доби топка пред шеснаесетникот и со силен, прецизен удар од дваесетина метри ја затресе мрежата на голманот Ангелини. Арсими со минимална предност замина на паузата, оставајќи впечаток дека може да го изненади фаворитот.
Во вториот дел, Струга тргна поофанзивно, а притисокот вроди со плод во 69. минута, кога по нафрлање од десната страна, Марјан Радески беше оставен сам и со удар со глава израмни на 1-1. Само три минути подоцна, нова грешка во домашната одбрана ја искористи Басиру Компаоре, кој му ја одзеде топката на Цуцули и прецизно биеше за целосен пресврт – 1-2.
До крајот, Струга рутински го задржа водството и стигна до вториот триумф во сезоната, со што по две кола има максимални шест бода. Арсими останува со еден освоен бод од ремито со Башкими во првото коло.
Во следната рунда, Арсими го очекува тешко гостување кај шампионот Шкендија, додека Струга ќе го пречека Работнички.
