ЖФК Билјанини Извори со полна мотивација и амбиција влегува во новата сезона, решен да ја врати својата елитна позиција во Првата женска фудбалска лига. Клубот од Охрид, поранешен шампион на Македонија и учесник во квалификациите за Лигата на шампиони, годинава гради моќен и добро организиран тим кој е прв фаворит за освојување на првото место во Втората лига – позиција која носи директен пласман меѓу најдобрите.
Како увертира за сезоната, сениорската екипа од 16 до 21 август ќе го претставува Охрид и Македонија на престижниот меѓународен турнир „Школа спорта и језика – Сурдулица 2025“ во Србија.
Настапот е поддржан од Општина Дебарца (главен спонзор за превоз) и Струга Трим Лум (главен спонзор), кои несебично го поддржуваат развојот и промоцијата на женскиот фудбал.
Под стратешкото водство на тренерот Александра Рубаноска, охридските девојки тренираат со полна посветеност, покажувајќи борбеност, тимска игра и силна желба да ја испишат најуспешната страница во историјата на клубот. Турнирот во Сурдулица ќе биде шанса за проверка на формата, стекнување меѓународно искуство, културни активности и нови пријателства.
Клубот останува пример за добра организација, финансиска стабилност и спортска визија – темели на кои ја гради својата нова успешна приказна.
