Актуелниот македонски кошаркарски шампион МЗТ Скопје Аеродром го реши прашањето околу новиот шеф на стручниот штаб. Искусниот српски стратег Дејан Мијатовиќ е назначен за нов тренер на „металците“, а заедно со него во клубот пристигнува и неговиот помошник Иван Дробњак.
Управата на МЗТ Скопје денеска го официјализираше ангажманот на 58-годишниот стручњак, кој ќе има задача да го предводи македонскиот шампион во продолжението од сезоната и во предизвиците на домашната, регионалната и европската сцена.
Мијатовиќ доаѓа на местото на Васко Атанасов, со кого раководството на клубот ја прекина соработката пред неколку недели.
Новиот предводник на МЗТ Скопје е роден во Чачак, Србија, а зад себе има долгогодишна тренерска кариера во која работел со повеќе познати кошаркарски клубови и репрезентативни селекции.
Неговиот последен ангажман беше во Борац Чачак, клуб кој се натпреварува во регионалната АБА-лига, каде што работеше во периодот од 2022 до 2024 година.
Тренерската кариера ја градеше и како прв стратег на Борац Чачак од 2000 до 2002 година, а потоа работеше во црногорски Ловќен, ОКК Београд и полскиот прволигаш Баскет Познањ.
Покрај самостојните тренерски ангажмани, Мијатовиќ стекна значајно искуство и како дел од стручните штабови на повеќе реномирани европски екипи.
Работеше во ФМП Железник, со кој во 2003 година го освои Купот „Радивој Кораќ“, како и во Хемофарм, германската Алба Берлин, каде што соработуваше со Лука Павичевиќ, и белградски Партизан, каде што исто така беше дел од стручниот штаб во период на освојување на Купот „Радивој Кораќ“.
Во неговата тренерска биографија се вбројува и ангажманот во германски Олденбург, каде што работеше со младинските категории.
Особено значајни во тренерската биографија на Мијатовиќ се успесите со младинските репрезентативни селекции.
Во 2006 година, како помошник во стручниот штаб на репрезентацијата на Србија и Црна Гора до 20 години, беше дел од тимот кој го освои златниот медал на Европското првенство.
Само една година подоцна, во 2007 година, Мијатовиќ оствари уште еден голем успех, овојпат како селектор на јуниорската репрезентација на Србија, која се закити со европското злато на шампионатот одржан во Шпанија.
Овие резултати, заедно со долгогодишната работа во клубската кошарка, го прават Мијатовиќ тренер со значајно меѓународно искуство.
Со ангажманот на Мијатовиќ и неговиот помошник Дробњак, МЗТ Скопје започнува ново поглавје на тренерската позиција.
Од клубот им посакаа добредојде на новите членови на стручниот штаб, изразувајќи надеж дека заедничката соработка ќе донесе нови победи и трофеи.
Пред српскиот стратег стои предизвикот да го предводи актуелниот македонски шампион во борбата за нови успеси, а неговото искуство од АБА-лигата, европските клубови и репрезентативната кошарка треба да биде значајно засилување за „металците“ во продолжението од сезоната.