Како што претходно објави Спортска Мрежа трката за опстанок во Прва лига ќе биде повеќе од неизвесна. Одамна не било вака повеќе екипи да бидат израмнети и практично може да се случи и последното 33. коло да решава кои екипи ќе испаднат кои ќе останат во Прва лига.
Една од екипите која води тешка борба за опстанок е и Беса од Добри Дол, дебитантот е во долниот дел од табелата, но со двете врзани победи против Шкупи на Чаир од 2:3 и победа против Струга Трим Лум на домашен терен од 3:2, тимот на Горазд Михајлов собра шест многу важни бодови и тоа од фаворити.
Во долниот дел ќе биде вистинска бркотница бидејќи екипите се израмнети. Воска Спорт е последна со 19 бодови, а по 21 бод имаат Беса која е претпоследна, Брера која е во бараж зоната како десетта и Тиквеш кој е во зоната за директен опстанок како деветти, исто така со 21 бод.
Овие екипи се најмногу загрозени за опстанок, а како што е познато последните две екипи испаѓаат директно во Втора лига, додека пак десеттопласираната екипа ќе игра бараж за можен опстанок во Прва лига со третопласираната екипа од Втора лига.
РАСПОРЕД НА БЕСА ДО КРАЈОТ ОД СЕЗОНАТА:
25 коло: Работнички – Беса
26 коло: Беса – Гостивар
27 коло: Силекс – Беса
28 коло: Беса – Шкендија
29 коло: Вардар – Беса
30 коло: Беса – Брера
31 коло: Тиквеш – Беса
32 коло: Беса – Воска
33 коло: Пелистер – Беса
До крајот од сезоната остануваат уште девет кола или во игра се 27 бодови, за кои екипата на Беса ќе треба да собере колку што може повеќе со цел да се избори со конкурентите за опстанок.
- ЦЕЛА ТАБЕЛА ОД ПРВА ЛИГА:
| Поз. | Клуб | ОН | Поб | Н | Пор | ПОС | ПРИ | ГР | БОД |
|---|---|---|---|---|---|---|---|---|---|
| 1 | ФК ШКЕНДИЈА АД | 24 | 14 | 8 | 2 | 39 | 19 | +20 | 50 |
| 2 | ФК СИЛЕКС АД | 24 | 14 | 6 | 4 | 41 | 15 | +26 | 48 |
| 3 | ФК РАБОТНИЧКИ АД | 24 | 12 | 9 | 3 | 29 | 13 | +16 | 45 |
| 4 | КФГ ГОСТИВАР АД | 24 | 11 | 11 | 2 | 31 | 13 | +18 | 44 |
| 5 | ФК СТРУГА-ТРИМ-ЛУМ АД | 24 | 11 | 5 | 8 | 30 | 30 | 0 | 38 |
| 6 | ФК ШКУПИ-1927 АД | 24 | 9 | 4 | 11 | 35 | 32 | +3 | 31 |
| 7 | ФК ПЕЛИСТЕР АД | 24 | 7 | 8 | 9 | 14 | 23 | -9 | 29 |
| 8 | ФК ВАРДАР АД | 24 | 5 | 7 | 12 | 20 | 33 | -13 | 22 |
| 9 | ГФК Тиквеш 1930 АД Кавадарци | 24 | 4 | 9 | 11 | 12 | 23 | -11 | 21 |
| 10 | ФК АП БРЕРА СТРУМИЦА АД | 24 | 5 | 6 | 13 | 25 | 41 | -16 | 21 |
| 11 | ФК БЕСА 1976 АД | 24 | 5 | 6 | 13 | 20 | 37 | -17 | 21 |
| 12 | ФК ВОСКА СПОРТ АД | 24 | 4 | 7 | 13 | 22 | 39 | -17 | 19 |
Беса минатата сезона стана шампион во Втора лига и обезбеди историски влез во Прва лига, а целта на тимот од Добри Дол е до дебитантската сезона да се избори за опстанок во фудбалската елита на Македонија.
