Ракометарите на Прилеп се вратија на победничките патеки и со значајни бодови од Струга ја продолжуваат борбата за место меѓу најдобрите во Суперлигата. Во рамки на 17. коло, прилепчани славеа со убедливи 25-33 (14-15) на гостувањето кај Струга и покажаа дека не се откажуваат од плеј-оф амбициите.
Средбата во спортскиот центар „Тими“ започна со погодок на Стефан Атанасовски за водство на домаќинот, а во воведните минути се играше израмнето, со чести промени во резултатот. Прилеп се обидуваше да се одлепи, но Струга секогаш наоѓаше одговор, па водствата од 8:10, 10:12 и 11:13 не беа доволни за посериозна разлика.
Гостите во неколку наврати имаа плус два, но стружани упорно се враќаа во игра. Сепак, финишот на првото полувреме им припадна на прилепчани, кои преку Димитар Димитриоски обезбедија минимална предност од 14-15 на паузата.
Клучните моменти се случија во вториот дел. По израмнетата игра до 40. минута, Прилеп влезе во серија и за првпат на мечот направи посериозна разлика. Со агресивна одбрана и ефикасен напад, гостите стигнаа до 18:22, а набргу потоа и до плус пет, со што практично го скршија отпорот на домаќинот во 46. минута.
Во продолжението избраниците на Наум Танески рутински ја одржуваа предноста и без поголеми проблеми го приведоа мечот кон убедлива победа од 25-33.
Најрасположен во редовите на Прилеп беше Димитар Димитриоски со 11 погодоци, додека кај Струга најмногу се истакна Ахмед Мајдоуб со пет голови.
Со оваа победа Прилеп останува во игра за плеј-оф, а во следното коло го очекува тежок предизвик на домашен терен против вицепрвакот Вардар. Струга, пак, ќе се обиде да се врати на позитивен резултат на гостувањето кај Куманово.
