Македонскиот ракомет испиша уште една значајна страница во својата историја, откако Гордана Ѓорѓеска од Гостивар беше делегат на Европското првенство во ракомет во инвалидски колички – EHF Wheelchair EURO 2025.
Со ова Македонија за првпат имаше свој официјален претставник на едно Европско првенство во оваа дисциплина, што претставува големо признание и за Ѓорѓеска лично, но и за македонскиот ракомет во целина.
Европското првенство се одржа од 26 до 30 ноември во Вилнус, Литванија, под покровителство на Европската ракометна федерација (EHF). Турнирот беше посебно значаен бидејќи за првпат се играше во мешан, четири-на-четири формат, ист како на Светските првенства под капата на IHF.
Гордана Ѓорѓеска по професија е дипломиран правник, а веќе осум години активно работи како ракометен делегат и контролор во македонскиот ракомет. Таа е и EHF лиценциран делегат за ракомет на песок, како и за ракомет во инвалидски колички, зад себе имајќи бројни меѓународни EHF настани.
Иако има богато искуство на европската сцена, ова беше нејзино прво Европско првенство во ракомет со инвалидски колички, а воедно и прво континентално првенство од ваков тип во нејзината кариера – искуство кое претставува голем чекор напред и силна потврда за нејзиниот професионализам.
Што се однесува до спортскиот дел, Португалија ја освои европската титула, пред Франција и Литванија, потврдувајќи го својот квалитет во оваа растечка ракометна дисциплина.
Настапот на Гордана Ѓорѓеска како официјален делегат на ваков настан е уште еден доказ дека македонските спортски работници имаат место и признание на највисоко европско ниво, а воедно и силен поттик за понатамошен развој и промоција на инклузивниот спорт.
