Тежок распоред имаше новиот прволигаш Скопје во првите четири кола од шампионатот. „Скопјани“ во досегашниот дел од сезоната се соочија со екипи кои имаат амбиции за самиот врв на табелата, па двете ремија и двата порази не се резултат кој треба премногу да загрижува.
Избраниците на тренерот Муарем Муарем денеска ги очекува нов предизвик, овојпат на гостински терен против Арсими во Гостивар. Новиот прволигаш се надева дека ќе одигра добар натпревар и ќе успее да стигне до првата победа во елитното друштво.
„Одиме по трите бода. Нѐ очекува важен натпревар и силна борба за нови бодови. Веруваме во триумф“, порачуваат од Автокоманда.
Во пресрет на овој натпревар, Скопје се наоѓа на деветтата позиција со два бода, додека Арсими е на седмото место и има шест освоени бода.
Натпреварот меѓу Арсими и Скопје ќе се одигра денеска, со почеток во 16.30 часот на Градскиот стадион во Гостивар, а ќе го суди Влатко Илиоски.
