Еурофарм Пелистер продолжува со максимален ефект во Регионалната лига. Битолчани вечерва на домашен терен го совладаа Ловќен со убедливи 45-33 и стигнаа до втората победа во новото натпреварување, по триумфот над Партизан во првото коло.
Уште од почетокот беше јасно дека бодовите ќе останат во Битола. Ловќен го отвори резултатот, но пелистерци веднаш возвратија со серија од 4-0 и ја презедоа контролата врз натпреварот. Во 10. минута домаќините имаа 9-4, а предноста продолжи да расте како што одминуваше првиот дел.
Во финишот на полувремето Еурофарм Пелистер веќе имаше двоцифрена разлика, а на пауза се замина со 24-15. Практично тогаш беше решено прашањето околу победникот, па вторите 30 минути беа можност битолчани да ја одржат контролата и да им дадат шанса на дел од новите засилувања.
Тимот на Лино Червар на крајот стигна до 45 постигнати голови, што го прави првиот состав во Регионалната лига со повеќе од 40 погодоци на еден натпревар. Сепак, примени 33 гола сигурно нема да бидат најомилениот дел од статистиката за хрватскиот стратег.
Капитенот Филип Кузмановски повторно беше лидер на тимот. По 15 гола против Партизан, овојпат постигна 14 погодоци и додаде пет асистенции. Двоцифрен учинок имаше и Ник Хенигман со 10 гола, додека Атанасијевиќ заврши со седум.
Червар овојпат им даде поголема минутажа и на новите играчи, па во листата на стрелците се запишаа Басанезе и Котар, како и Белистојаноски и Калајџиески. На голот својата шанса ја доби и Давид Брестовац.
Пелистер со триумфот од 12 гола разлика го запиша и најубедливиот резултат досега во Регионалната лига. Кај Ловќен, Вујовиќ и Анѓелиќ беа најефикасни со по седум погодоци.
