Голманот на Вардар, Милош Валах, остави силен статистички белег во групната фаза од Лигата на шампионите, во која се вброи меѓу најуспешните чувари на мрежата во елитното европско натпреварување.
Полскиот интернационалец забележа 53 одбрани, резултат со кој го зазеде осмото место на листата според вкупниот број интервенции. Сепак, уште повисоко котира кога станува збор за процентуалната успешност. Со 33,12% одбранети удари, Валах се најде на четвртата позиција меѓу голманите во групната фаза.
Пред него според бројот на одбрани се Сергеј Ернандез од Барселона со 86, Магнус Петерсен од Архус со 75, Небојша Симиќ од Мелсунген со 74 и Емил Нилсен од Веспрем со 73 интервенции. Кристофер Бонде од Нант и Кристијан Пилиповиќ од Криенс-Луцерн имаат по 58, додека Милјан Вујовиќ од Висла Плоцк е пред Валах со 56 одбрани.
Во категоријата процент на успешност, пред вардаровиот голман се Ернандез со 39,09%, Нилсен со 36,32% и Вујовиќ со 33,94%.
Пласманот меѓу најдобрите голмани во Лигата на шампионите е значаен индивидуален резултат за Валах, особено во конкуренција на голманите на водечките европски екипи. Вардар не успеа да обезбеди место во следната фаза од елитното натпреварување, па европската сезона ќе ја продолжи во Лигата на Европа.
