Македонскиот футсал шампион Проект е подготвен за првиот европски предизвик. Вечерва од 20:00 часот тимот го очекува дуел против домаќинот Атлетик Футсал Клуб Грац, во рамки на претквалификациската група А од Лигата на шампионите.
Во таборот на Проект владее позитивна атмосфера, а подготовките за вечерашниот натпревар се заокружени со последната анализа на противникот и финалните тактички подготовки.
Стручниот штаб детално го анализираше начинот на игра на австрискиот шампион, неговите силни и послаби страни, движењата во различните фази од играта, како и ситуациите при прекини.
На последниот утрински тренинг фокусот беше ставен на тактичката поставеност, организацијата во одбраната и нападот, транзицијата и реализацијата на замислите кои треба да се применат на теренот.
Македонскиот шампион зад себе има сезона во која ја освои двојната круна, а во првенството оствари максимален ефект, без пораз и без реми. Сега тимот сака својата домашна доминација да ја претстави и на европската сцена.
Вечерашниот противник ќе биде особено мотивиран бидејќи станува збор за домаќинот на групата и шампионот на Австрија, но Проект влегува во натпреварот со јасна филозофија – дисциплинирана игра, максимална концентрација и верба во сопствените квалитети.
Сите мисли во македонскиот табор се насочени кон првите европски 40 минути за оваа сезона.
🇲🇰 ПРОЕКТ – ГРАЦ 🇦🇹
📅 26 август 2026
🕗 20:00 часот
🏟️ Blue Box, Грац
📺 Ќе има и пренос во живо, а линкот за следење на натпреварот ќе биде споделен еден час пред почетокот.
Спортска Мрежа од Грац – ексклузивно го следиме секој чекор на македонскиот шампион!
