ГРАЦ, АВСТРИЈА – Македонскиот футсал шампион Проект вечерва од 20:00 часот го започнува својот европски предизвик во претквалификациите за Лигата на шампионите, а првиот противник ќе биде домаќинот Атлетик Футсал Клуб Грац.
Местото на првиот натпревар, но и на сите од групата е „Blue Box“ – модерна троделна спортска сала во Грац, која е изградена како дел од комплексот на BG/BORG Graz-Liebenau.
Иако однадвор впечатокот е дека станува збор за компактен спортски објект, „Blue Box“ е внимателно проектирана арена која ги исполнува условите за одржување и на меѓународни спортски натпревари.
- Модерна сала изградена четири метри под земја
Новата спортска сала е изградена на површина од околу 2.200 квадратни метри и претставува дополнителен модул на постојниот спортско-образовен комплекс.
Еден од најинтересните архитектонски детали е фактот што објектот е вкопан околу четири метри во земјата. Причината била да се намали висината на објектот во однос на околината и да се зачуваат интересите на жителите во соседството.
Сепак, и покрај тоа што е спуштена во земјата, внатрешноста морала да обезбеди висина од девет метри, што било еден од условите за исполнување на стандардите за меѓународни натпревари.
- Три спортски терени во една сала
„Blue Box“ е троделна спортска сала, која со помош на мобилни преградни завеси и мрежи може да се подели на три сегменти.
Еден дел е специјално опремен за потребите на училишниот спорт, додека другите два се наменети за различни спортови со топка.
Токму поради својата функционалност, објектот не е наменет само за учениците од училиштето. Салата ја користат и градот и покраината, а меѓу корисниците е и спортскиот компетентен центар на одбојкарската академија.
За вечерашниот футсал натпревар, сепак, целиот фокус ќе биде на главниот терен и на европската сцена.
- Капацитет до 566 гледачи
Една од најважните работи за секој голем натпревар е капацитетот. Фиксната трибина е проектирана за околу 300 гледачи, со дополнителни места за лица во инвалидски колички. Со активирање на трите телескопски, односно подвижни трибини, капацитетот може значително да се зголеми.
Според проектните податоци, салата може да достигне капацитет од 566 гледачи.
Целиот простор за гледачите е организиран така што пристапот е без бариери, а движењето на публиката е целосно одвоено од движењето на спортистите.
- Посебни влезови за спортисти и публика
Архитектите посветиле големо внимание и на организацијата на објектот.
Посетителите во салата влегуваат преку фоајето и од таму имаат директен пристап до трибините. Спортистите и членовите на екипите, пак, имаат посебен пристап до соблекувалните и спортскиот дел.
На тој начин се обезбедува јасна поделба помеѓу училишниот процес, клубовите и организаторите, спортистите и гледачите.
Во подземниот дел се наоѓаат соблекувалните, санитарните простории, медицинска соба и останатите придружни простории. Една од соблекувалните е целосно прилагодена за лица со инвалидска количка и располага со соодветна туш-кабина.
- Сината боја е заштитен знак на „Blue Box“
Она што најмногу ја издвојува салата од околината е – сината боја.
Фасадата е изработена во впечатлива сина боја, а истиот визуелен концепт продолжува и на спортското игралиште пред салата. Така, објектот и надворешниот терен визуелно создаваат една целина.
На фасадата се поставени и испрекинати и заоблени линии во форма на параболи, кои симболично ја претставуваат динамиката на спортовите што се играат во салата.
Посебен архитектонски ефект создава хоризонталниот светлосен појас во долниот дел на фасадата, кој во вечерните часови свети и визуелно ја „олеснува“ масивната конструкција.
- Дури и подот е специјално изработен
Интересна е и приказната за подот во салата. Инвеститорот сакал дрвен паркет, но архитектите имале дополнителна идеја – подот да биде син.
Бидејќи станувало збор за необично барање, производителот на паркетот развил посебна технологија за да може дрвената подлога да добие сина завршна површина. Паркетот фабрички бил заштитен со UV-лак, а завршниот слој бил направен со син двокомпонентен PU-лак.
Така и самиот терен станал дел од препознатливиот визуелен идентитет на „Blue Box“.
- Сала создадена за големи натпревари
Природното осветлување во спортската сала доаѓа од северната страна, со цел да се избегнат непријатните рефлексии и заслепувањето на спортистите. Дополнително, кровните светлосни отвори обезбедуваат основна природна светлина и имаат функција за одведување на чад во случај на пожар.
Целиот објект е проектиран од архитектонското студио Hofrichter-Ritter Architekten од Грац.
Интересен е и фактот што сината фасада била голем предизвик за изведувачите. Станува збор за една од најголемите непрекинати фасади во Австрија изведени со крупнозрнест прскан малтер. Целта била текстурата да биде слична на онаа на спортскиот терен пред салата.
- 🇲🇰 ПРОЕКТ ВЕЧЕРВА ВО „BLUE BOX“
Во токму оваа арена, македонскиот шампион Проект вечерва ќе го направи новиот чекор во својата европска авантура, по сезона 2021/2022.
Тимот од Македонија во Грац пристигна по фантастичната сезона 2025/2026, во која ја освои двојната круна и првенството го заврши без пораз и без реми.
Во подготовките за европските натпревари, Проект одигра контролни средби со Дреница, двапати со бугарскиот шампион Амиго Нортвест, а во последната проверка убедливо со 7:0 го совлада Пирот.
Македонскиот шампион синоќа го одработи првиот тренинг во „Blue Box“, а утрово и последниот тренинг пред вечерашниот натпревар.
Сите играчи се подготвени за настап, а во екипата владее позитивна атмосфера.
🕗 ПРОЕКТ – АТЛЕТИК ФУТСАЛ КЛУБ ГРАЦ
- 20:00 часот | „Blue Box“, Грац
По вечерашниот натпревар, Проект ќе ги одигра и следните два дуели:
🇸🇮 27 август, 17:30 часот
Проект – Врхника
🇮🇱 29 август, 17:30 часот
Макаби Нетанја – Проект
Спортска Мрежа, како единствен медиум од Македонија на лице место во Австрија, ексклузивно ќе ја следи европската приказна на македонскиот шампион и ќе известува од сите натпревари во претквалификациската група.
Вечерва првиот европски тест. Првата европска приказна. И тоа во сината арена на Грац.
