Еурофарм Пелистер вечерва го игра вториот натпревар во новата сезона од Регионалната лига, а по успешниот старт против Партизан, битолчани повторно ќе играат пред својата публика. Во салата „Боро Чурлевски“ гостува црногорскиот шампион Ловќен, а почетокот на натпреварот е закажан за 18:00 часот.
Пелистерци ја отворија сезоната со победа над Партизан од 35-31 во натпревар одигран пред полни трибини. Избраниците на Лино Червар одиграа сигурно и заслужено стигнаа до првите бодови, а особено се истакна капитенот Филип Кузмановски.
Македонскиот репрезентативец беше главниот предводник на нападот со дури 15 погодоци, а дополнително запиша и девет асистенции. Никола Граховац и Ник Хенигман постигнаа по четири гола, додека кај Партизан најдобар стрелец беше Тобијас Вагнер со десет погодоци.
Червар на премиерниот натпревар не ги искористи сите расположливи адути, па останува да се види со каков состав и пристап ќе влезе во вечерашниот дуел со Ловќен.
Целта на битолчани е јасна – со нова победа пред домашната публика да го продолжат успешниот почеток во регионалното натпреварување.
