По првата недела од подготовките, тренерот на МЗТ Скопје, Васко Атанасов, даде првична оценка за досегашниот тек на подготовките и откри што можат навивачите да очекуваат од тимот во новата сезона.
„Подготовките се одвиваат според планот. Тимот е заедно, сите се здрави и работиме добро на адаптацијата и вклопувањето во нашиот систем. Успеавме да ангажираме играчи за кои сметаме дека добро ќе се вклопат во нашите идеи за игра“, вели Атанасов.
Тој истакна дека составот е нешто поинаков во однос на минатата сезона, но дека искуството и лидерството ќе бидат едни од главните адути на екипата.
„Сезонава имаме ростер кој е малку поинаков од претходните, со одлично ветеранско лидерство и играчи кои знаат што е потребно за да се победува. Секако, ќе се стремиме да бидеме агресивни на двете страни од теренот, а брзината ќе биде нешто што е клучно за нас.“
Како столбови на екипата и оваа сезона се издвојуваат Војдан и Дамјан Стојановски, а дополнителна сила во нападот треба да донесе американскиот плејмејкер Ноа Фаракан.
„Како и секогаш, столбот на тимот ќе бидат Војдан и Дамјан Стојановски, а со додавањето на нашиот плејмејкер Ноа Фаракан, кој е вистински поентер на позицијата еден и ќе го надополни нашиот напад, тие ќе бидат едни од темелите на тимот. Ангажманите на искусниот центар Димитрије Николиќ и разноврсниот Лесли Варнер ќе ни дадат предност што ја немавме минатата сезона“, додава тренерот.
Амбициите на МЗТ Скопје остануваат високи – борба за трофеи и победа на секој натпревар.
„Нашата цел секогаш е иста – победа на секој натпревар, атак на секој трофеј, како и достојна презентација на Аеродром и на македонската кошарка во целост. За тоа ни треба и помошта од трибините, која сигурен сум дека нема да изостане. Заедно сме најсилни!“, порача Атанасов.
