Довчерашниот капитен на КК Пелистер, Дарко Најдовски, стави крај на својата играчка кариера и започнува ново поглавје – тренерската кариера.
Поранешниот лидер одлучи новата сезона да ја дочека во нова улога. Најдовски ќе се приклучи кон стручниот штаб предводен од Тане Спасев, каде заедно со Владимир Николовски ќе ја извршува функцијата асистент-тренер.
Со овој потег КК Пелистер продолжува да им дава шанса на млади и перспективни тренери, во кои клубот има целосна доверба. Богатото играчко искуство на Најдовски се очекува да биде од голема помош за стручниот штаб, но и за младите кошаркари кои допрва треба да се наметнат во сениорскиот тим.
Од Пелистер веруваат дека неговото знаење, искуство и познавање на клубот ќе помогнат во развојот и откривањето на нови таленти, кои во иднина треба да го носат товарот во сениорската екипа.
