Македонската женска јуниорска репрезентација стигна до првата победа на Европското првенство од Дивизијата „Б“, откако во натпреварот од групата за пласман убедливо ја совлада Норвешка со 67:41.
По несреќниот пораз од Азербејџан, нашите кошаркарки влегоа во натпреварот со голема мотивација и желба да покажат дека имаат квалитет за подобри резултати. Тоа го демонстрираа уште од самиот почеток.
Македонија одигра одлично во првите десет минути, особено во одбраната, а со ефикасна игра во нападот направи огромна разлика. По првата четвртина резултатот беше 26:6 во наша корист.
Предноста продолжи да расте и во вториот период. Избраничките на селекторот Виктор Петровски не дозволија пад во играта, па на паузата заминаа со предност од дури 29 поени, односно 40:11.
И во продолжението македонските јуниорки ја задржаа контролата врз натпреварот. По третата четвртина беше 61:28, па последниот период беше само формалност околу конечниот исход.
Селекторот им даде шанса на сите 12 кошаркарки, а секоја од нив успеа да придонесе во убедливиот триумф.
Најдобра поентерка во македонскиот состав беше Ива Колева со 16 поени, а зад своето име запиша и шест асистенции и четири скока.
Македонија утре ќе го одигра последниот натпревар на шампионатот во Тулчеа. Од 9:00 часот противник ќе биде Естонија, а со нова победа нашите јуниорки ќе се обидат да стигнат до што подобар пласман во борбата за позициите од 17. до 20. место.
