Машката кадетска репрезентација на Македонија го претрпе првиот пораз на Европското првенство од Дивизијата „Б“, откако во натпреварот од второто коло во Гевгелија загуби од Исланд со 69:78.
Исланѓаните имаа подобар почеток и уште во првата четвртина успеаја да создадат двоцифрена предност. Македонија тешко влезе во натпреварот, што противникот го искористи за водство од 23:10 по првите десет минути.
Во вториот период нашите кошаркари го подигнаа нивото на игра. Покрај Зунзуровски, во нападот се приклучи и расположениот Шабани, па разликата постепено почна да се намалува. Со серија од 11:5, Македонија ја сведе негативата на едноцифрена, а на полувремето Исланд водеше со 35:28.
Во првото полувреме Македонија имаше сериозни проблеми со шутот, реализирајќи само една тројка од десет обиди, како и пет од 11 слободни фрлања. Во скокот нашите кошаркари беа рамноправен противник, но загубените топки беа сериозен проблем, бидејќи Македонија направи дури 10 загубени топки во првите 20 минути.
По четири минути игра во третата четвртина, по поените на Коневски, Македонија се доближи на само два поени негатива (38:40). Неизвесноста продолжи до крајот на периодот, кој Исланд го доби со минимални 24:28, за предност од 59:56 пред последните десет минути.
Нашите кадети во повеќе наврати беа на чекор до целосен резултатски пресврт, но не успеаја да го направат последниот чекор. При резултат 61:64 пропуштија неколку напади и можности од линијата за слободни фрлања, што Исланд го искористи за серија и водство од 69:61.
Шабани накратко ја прекина серијата на противникот, а Анѓеловски намали на 65:72, но Исланд сигурно ја контролираше завршницата и не дозволи Македонија да се врати во мечот. На крајот, Исланѓаните славеа со 78:69.
Втора вечер по ред најдобар во македонскиот состав беше Дион Шабани, кој запиша нов дабл-дабл учинок од 26 поени, 11 скока и три асистенции. Александар Зунзуровски натпреварот го заврши со 22 поени и 10 скока. Коневски и Џолев постигнаа по седум поени, додека Анѓеловски заврши со шест.
Во натпреварот од третото коло, денес од 18:30 часот, Македонија ќе се сретне со селекцијата на Хрватска. Хрватите денеска убедливо го совладаа Кипар со 107:33 и со две победи се наоѓаат на првото место во групата „Б“.
