Брегалница в сабота ќе го одигра првиот домашен меч од новата сезона во рамките на 2. коло на ПМФЛ, а на кој меч кој се игра под рефлектори „сините“ ќе бараат први бодови.
Капитенот на Брегалница, Стефан Коцев вели дека работеле напорно изминатиот период и дека се фокусирани на зацртаната цел – три бодови.
„Атмосферата во клубот е одлична. Работиме напорно, владее позитивна енергија и сите сме максимално посветени и фокусирани на зацртаната цел. Новите засилувања донесоа дополнителен квалитет и конкуренција во тимот, што само нѐ прави посилни. Како капитен, верувам во оваа екипа и во работата и енергијата што ја вложуваме секој ден. Во сабота нѐ очекува тежок натпревар против Арсими, но со максимално сериозен пристап, борба и поддршка од нашите навивачи, верувам дека ќе ги освоиме трите бода. Ја повикувам штипската публика и навивачите во сабота, да го “наполниме” Градски и на крај сите заедно да се радуваме на првите 3 бодови во новата сезона во прва лига“, изјави капитенот Коцев.
Натпреварот се игра со почеток од 19 часот на Градскиот стадион во Штип, а цената на билетот изнесува 100 денари.
