Пелистер „откина“ бодови во дуелот во Пржино со шампионот Скопје, откако двете екипи одиграа 1:1 во меч од 8. коло на Првата женска фудбалска лига.
Искусната Мила Талевска во 17. минута го отвори резултатот за водство од 0:1. Пелистер умешно ја чуваше чиста мрежата и одолеваше на секој напад на противникот, но во 77. минута Рабија Дервиши погоди за конечни 1:1.
Со овој пораз Скопје го препушти врвот на Љуботен, кој на домашен терен со 3:1 го доби Ас Јунајтед преку пресврт. Во Тетово беше повеќе од возбудливо, откако Јована Павловска во 74. минута го отвори резултатот за водство на стружанки од 0:1. Но, радоста не траеше долго, во 82. минута Улза Максути погоди против поранешниот клуб за 1:1, а во 88. минута Максути со втор гол обезбеди пресврт за водство на Љуботен од 2:1.
Победата ја потврди Калина Попески која во 91. минута беше прецизна за конечни 3:1.
Каменица Саса без проблеми како на тренинг меч го доби Кочани во гости со високи 0:4. Јована Петрушовска во 9. минута ја стресе мрежата на „фенерџијата“, а во 20. минута Ана Димитровска погоди за 0:2, а по пет минути Селин Туркоглу погоди за 0:3 на полувреме.
Во вториот дел капитенот Ана Димитровска со втор гол ги потврди конечните 0:4.
Вардар дојде до втората сезонска радост откако на убедлив начин ја доби Речица со 0:6. Кристина Крстева и Настасја Накова беа двојни стрелци, а по еден гол постигнаа Меланија Грозданова и Јулија Живиќ.
Сега Љуботен е на врвот од табелата со 20 бодови, шампионот Скопје е на второто место со 19 бодови, а пак Пелистер е трет со 17 бодови. На делба на четвртото место се Тиверија Брера и Каменица Саса со по 16 бодови.
Веднаш огромен бодовен пресек на табелата. Ас Јунајтед е шести со осум бодови, Вардар е седми со седум бодови, Истатов сега е осми со шест бодови.
Во бараж зоната е Речица која на своето конто има четири бодови, а пак Кочани е на дното со еден бод.
