Со големото финале беше спуштена завесата на уште едно успешно издание на традиционалниот турнир во мал фудбал во Општина Конче, кој и оваа година донесе возбудливи натпревари, одлична посетеност и богата организација.
Организаторите изразија благодарност до сите екипи, фудбалери, спонзори и бројната публика која секоја вечер беше дел од турнирот, истакнувајќи дека целта е оваа спортска манифестација од година во година да прераснува во уште поквалитетен настан преку организациски подобрувања и нови содржини.
И годинава беше организирана традиционалната лотарија, преку која беа доделени голем број награди за посетителите, а благодарност беше упатена и до Спортска Мрежа за медиумската поддршка и директните преноси од полуфиналните натпревари, мечот за третото место и големото финале.
На теренот, во натпреварот за третото место, екипата на Перо и Тајфата убедливо славеше со 8:0 против Дивино. Во големото финале, пак, Црна Река славеше над екипата на Фреигхт Оне со 4:1 и заслужено го освои победничкиот пехар.
Конечниот пласман изгледа вака:
🥇 Црна Река
🥈 Фреигхт Оне
🥉 Перо и Тајфата
4️⃣ Дивино
По завршувањето на турнирот беа доделени и индивидуалните признанија. За најдобар играч беше избран Тале Трајков, признанието за најдобар голман му припадна на Филип Гигов, додека титулата најдобар стрелец ја понесе Никола Димов.
Од организацискиот одбор порачаа дека успешно е затворено уште едно поглавје од турнирот, со желба традицијата да продолжи и во иднина, а на сите учесници и поддржувачи им упатија благодарност за придонесот во уште едно успешно издание на оваа спортска манифестација.
