Женскиот ракометен клуб Астибо најверојатно нема да настапува во Супер женската лига во сезоната 2026/27, иако минатата сезона на терен го обезбеди опстанокот во елитното друштво. Според информациите, штипскиот клуб ќе се пријави за настап во Првата лига, а главната причина за ваквата одлука се финансиските можности.
Од клубот сметаат дека трошоците за настап во најсилната конкуренција се преголеми во однос на актуелниот буџет, поради што фокусот ќе биде ставен на развојот на младите ракометарки. Во новата сезона се очекува Астибо да настапува претежно со пионерскиот состав, кој во изминатиот период покажа дека располага со голем потенцијал.
Со евентуалното повлекување од Супер лигата, Штип ќе остане без женски суперлигашки ракомет, иако Астибо зад себе има успешна сезона во која со победата во Битола го обезбеди опстанокот во елитата.
Клубот во изминатите години беше препознатлив по добрите резултати, а една од најистакнатите ракометарки беше Марија Анчева, која важи за еден од најдобрите стрелци во Македонија и на Балканот. Таа во иднина ќе биде посветена на тренерската работа со пионерската екипа, која веќе бележи значителен напредок и настапи на завршниот турнир, што претставува потврда за квалитетот на младите генерации во клубот.
Астибо во изминатиот период беше една од позитивните приказни во македонскиот женски ракомет, а тимот имаше силна поддршка од штипската публика.
Доколку одлуката биде и официјално потврдена, Астибо следната сезона ќе настапува во Првата женска лига со значително подмладен состав и јасна цел – развој на домашни ракометарки, стабилизација на клубот и создавање основа за идно враќање во Супер лигата.
