ГРК Охрид продолжува со сериозното засилување на играчкиот кадар за новата сезона, а најново име во редовите на „гладијаторите“ е искусниот лев бек Филип Талески.
Триесетгодишниот ракометар стави потпис на договор за сезоната 2026/27, со можност соработката да биде продолжена и за уште една година. Во охридскиот тим ќе го носи дресот број 28.
Талески во Охрид пристигнува од унгарска Татабања, а зад себе има богата интернационална кариера. Ракометните почетоци ги имаше во Металург, по што направи трансфер во германскиот гигант Рајн Некар Левен, со кој ја освои титулата во Бундеслигата. Во Германија настапуваше и за Балинген, а во кариерата ги бранеше и боите на Вардар 1961 и португалска Бенфика.
Со ангажманот на Талески, охридскиот клуб го реализира осмото официјално засилување за претстојната сезона. Претходно во клубот пристигнаа бековите Никола Зечевиќ, Мартин Карапалевски, Мартин Ивановски и Доминик Мате, крилото Адама Кеита, голманот Дино Славиќ и јапонскиот пивот Шуичи Јошида.
По потпишувањето на договорот, Талески не го криеше задоволството што кариерата ќе ја продолжи во Охрид.
„Потписот за ГРК Охрид за мене претставува нов, голем предизвик и исклучително мотивирачки проект. Клубот покажа огромна желба, сериозна визија и амбиција кои целосно се поклопуваат со моите лични и спортски цели. Среќен сум што ќе го носам дресот на Охрид, клуб кој незапирливо расте и има фантастична публика. Охрид заслужува големи ракометни успеси, а јас сум тука да го дадам својот максимум на секој натпревар за да ги оствариме зацртаните цели на клубот како во домашното првенство, така и на меѓународна сцена“- изјави Талески.
Со ангажманот на Талески, Охрид дополнително го засилува ростерот во пресрет на новата сезона, во која клубот ќе има високи амбиции и на домашната, и на европската сцена, каде ќе ја брани титулата во ЕХФ Европскиот Куп.
