Градоначалникот на Општина Струга, Менди Ќура, оствари средба со ракометарките на Женскиот ракометен клуб „Струга 2024“, кои зад себе имаат успешна сезона, крунисана со освоеното трето место.
На приемот, градоначалникот им честиташе за одличниот резултат и им посака уште поголеми спортски успеси во периодот што следува, истакнувајќи дека нивниот успех претставува гордост за Струга и пример за младите спортисти.
Во разговорот со ракометарките, Ќура нагласи дека Општина Струга е свесна за условите во кои функционираат младите спортски колективи, но потенцираше дека тие не смеат да бидат пречка за нивната амбиција, посветеност и желба за напредок.
Тој ја потврди и заложбата на локалната самоуправа да продолжи со активности насочени кон подобрување на спортската инфраструктура и условите за работа, нагласувајќи дека Општина Струга ќе остане вистински партнер и поддршка на сите спортски клубови.
Од Општина Струга порачаа дека успесите на младите спортисти се најдобра мотивација за понатамошни инвестиции во спортот и развојот на идните генерации, упатувајќи им честитки на ракометарките на ЖРК „Струга 2024“ за освоеното трето место и желби за уште поголеми достигнувања во наредните сезони.
