Огнен Стефановски испиша историја: Нов македонски рекорд во десетобој!

Македонскиот атлетичар Огнен Стефановски испиша ново историско поглавје во македонската атлетика, откако постави нов национален рекорд во дисциплината десетобој на Националното првенство на Словенија кое се одржа во Марибор.

По два исклучително тешки и квалитетни натпреварувачки дена, во кои настапуваше во десет различни дисциплини, Стефановски освои вкупно 7189 бодови и на тој начин го подобри досегашниот македонски рекорд за дури 541 бод.

Остварениот резултат според официјалната светска атлетска таблица вреди 1001 поен, што претставува огромен успех за македонската атлетика и уште една потврда за квалитетите на младиот македонски репрезентативец.

Со новиот рекорд, Стефановски се вбројува меѓу најуспешните македонски атлетичари во историјата на повеќебојот, а воедно испраќа сериозна најава дека може да биде конкурентен и на големите меѓународни сцени.

Македонскиот репрезентативец нема многу време за одмор, бидејќи веќе следниот викенд го очекува настап на Европското првенство за мали земји, додека на 20 јуни ќе настапи и на Балканското првенство за сениори, каде што ќе конкурира и за освојување медал.

Македонската спортска јавност со големо внимание ќе ги следи неговите следни настапи, бидејќи Огнен Стефановски дефинитивно најавува блескава иднина и нови успеси за македонската атлетика.