Последните две есенски кола од Првата лига ќе се одиграат без публика, за што информираше ФФМ за одлуката на комисијата за натпреварување, по претходно барање на Министерството за внатрешни работи, а поради неодамнешните случувања и спречување на било каков вид на насилство и недолично однесување пред, за време и по одигрување на фудбалските натпревари.
Брера Струмица на домашен терен ќе игра против Работнички, во меч каде струмичани и „романтичарите“ силно ги посакуваат трите бодови. И двете екипи сакаат да фатат и да влезат во победнички ритам и да имаат позитивна серија резултат во финишот од есенската полусезона.
Вардар на домашен терен ќе игра против Тиквеш, ова ќе биде соочување за трите бодови, а со тоа и бегство од опасната зона.
Шкупи на Чаир ќе го пречека актуелниот шампион Струга Трим Лум, каде „гулабите“ влегоа во голема резултатска криза и од последните пет натпревари ја имаат најлошата форма со пет порази во низа, во однос на Струга која влезе во победничка серија.
Воска Спорт на „Билјанини Извори“ во Охрид ќе го пречека поранешниот шампион Шкендија од Тетово, каде гостинот е фаворит, а домаќинот ќе сака изненадување, па макар тоа било бод.
Гостивар и Силекс играат дерби за врвот во Првата лига, двете водечки екипи во директен дуел, а од истиот најмногу може да ќари Шкендија.
Во Битола соочување на двата лански второлигаши, Пелистер на домашен терен против Беса, каде и двете екипи ќе бараат три бодови и победа за враќање прогрес на табелата.
Натпреварите се играат без публика, а стартуваат во 13 часот.
