Екипата на Беса Сарај влезе во одлична резултатска серија, откако забележа пет победи во низа во Третата македонска фудбалска лига – Север.
Тимот се наоѓа во извонредна форма, што резултираше со значителен напредок на табелата.
Во рамки на 14. коло, Беса Сарај на домашен терен го совлада Куманово со 3-1, по што следуваше гостинска победа во 15. коло над Лопате од 3-1.
ОХРИД КУП 2026 – ТУРНИР НА КОЈ СЕКОЕ ДЕТЕ ДОБИВА МЕДАЛ
Во 16. коло беше забележан уште еден домашен триумф, овојпат против Пчиња со 2-1, а потоа Беса Сарај славеше и на гостувањето кај Аеродром со 2-1. Победничката серија беше заокружена во 18. коло со убедлив триумф од 4-1 над Студеничани.
Овие резултати се плод на континуирана и темелна работа во клубот, добра организација и јасна стратегија за развој на екипата, која минатата сезона преку бараж обезбеди пласман во оваа конкуренција и продолжува со стабилен напредок.
Голема улога има и поддршката од навивачите, кои во голем број ги исполнуваат трибините на домашните натпревари, но и ја следат екипата на гостувањата.
По 18 одиграни кола, Беса Сарај се наоѓа на шестата позиција со 26 освоени бодови. Во следното коло, тимот ќе гостува кај Ржаничино, каде ќе се обиде да ја продолжи победничката серија и да стигне до шести триумф во низа.
