Интересот за првото издание на меѓународниот младински турнир „Охрид Куп 2026“ е во постојан пораст, а пријавите за учество се веќе официјално отворени. Турнирот, кој ќе се одржи од 18 до 21 јуни на терените на СРЦ „Билјанини Извори“, најавува вистински фудбалски празник за најмладите.
Се очекува учество на екипи од Македонија и странство, а интересот кај клубовите и академиите е значителен уште во раната фаза на пријавување. Организаторите најавуваат четири дена исполнети со натпревари, дружење и развој на младите фудбалски таленти, во прекрасен амбиент покрај Охридското Езеро.
Турнирот е наменет за генерации 2015, 2016, 2017, 2018 и 2019. „Охрид Куп 2026“ има за цел да ги промовира вистинските вредности на спортот – фер-плејот, почитта и другарството. Посебен акцент е ставен на учеството и радоста од играта, па така секое дете ќе добие медал, без разлика на постигнатиот резултат.
Дополнителна мотивација за учесниците претставува и медиумската поддршка. Секоја екипа што ќе биде дел од турнирот ќе добие бесплатна промоција во текот на целата 2026 година на Спортска Мрежа, кој ќе биде официјален медиумски покровител на настанот.
Пријавувањето е во тек, а заинтересираните екипи можат да се пријават на телефонските броеви 070 223 521 и 078 646 698, како и преку порака до редакцијата на „Спортска Мрежа“.
Со ваков концепт и веќе изразен интерес, „Охрид Куп 2026“ најавува да стане еден од најатрактивните детски турнири во регионот.
