На фудбалскиот терен во општина Конче започнаа активностите за изградба на нова соблекувална, со која спортистите од општината ќе добијат подобри и посовремени услови за подготовка и тренинг.
За почетокот на активностите информираше градоначалникот на општина Конче, Златко Ристов, кој истакна дека проектот е дел од континуираната поддршка за спортот и младите.
„Денес поставивме темели на соблекувална на фудбалско игралиште во Конче. Со тоа спортистите од општината ќе добијат современи услови за подготовка и тренинг. Со активностите се предвидува изградба на современа соблекувална со исполнување на техничките стандарди и нормативи. Продолжуваме со поддршка и инвестирање во спортот и младите“, вели градоначалникот на општина Конче, Златко Ристов.
Во општина Конче функционира фудбалскиот клуб Серта, кој е дел од локалниот спортски живот. Како рурална општина, Конче посветува внимание на развојот на спортот, а покрај фудбалот, во последниот период започна со работа и ракометниот клуб Феникс од Радовиш. Во општината има и боречки клуб, што дополнително ја збогатува спортската понуда.
Конче е познато и по традиционалниот турнир во мал фудбал, кој се организира по повод празникот Петровден и претставува можност за спортско дружење и натпреварување.
Изградбата на новата соблекувална е чекор кон подобрување на спортската инфраструктура и создавање посоодветни услови за локалните спортисти. Инвестициите во вакви објекти се важни за развојот на клубовите, поттикнување на младите да се занимаваат со спорт и зацврстување на спортскиот живот во општината.
