Двократниот европски шампион Вардар 1961 покажа карактер шампионски калибар и со голем пресврт го совлада Мелсунген со 37-33 (18-19) во второто коло од главната фаза на Европската лига. Во СЦ „Јане Сандански“ се славеше победа извојувана со срце – по негатива од шест гола во првиот дел.
Иако стартот ветуваше со добра игра и рани голови, Вардар влезе во период на грешки, што гостите безмилосно го казнија. Германскиот тим стигна и до 6-12, а трибините на кратко замолкнаа.
Но токму тогаш почна будењето. Со влезот на Милош Валах меѓу стативите и серијата интервенции, „црвено-црните“ фатија ритам. Головите на Малус, Воркапиќ и Тузолана ја стопија разликата, па на пауза се замина со само гол негатива (18-19).
Вториот дел донесе експлозија. Вардар врза три гола по ред и го презеде водството – момент што ја запали салата. И кога Мелсунген повторно се обиде да возврати, вардарци одговорија со мирнотија и зрелост. Клучниот период дојде по 26-26, кога домаќинот ја казнуваше играта без голман на ривалот и со три гола во празна мрежа се одлепи на 31-27. Од тој момент, пресвртот беше комплетиран – а победата неминовна.
Лидери на теренот беа Јака Малус со 10 гола и Вукашин Воркапиќ со 9, додека Милош Валах блесна со 14 интервенции – неколку од нив во најкритичните моменти кога се кршеше мечот.
Вардар покажа дека има карактер, длабочина и вера кога е најтешко. Со новите бодови, скопскиот тим останува во игра за висок пласман во групата и следниот предизвик го пречекува со крената глава – и со публика која му верува.
