По убедливата победа над РК Тинекс Пролет со 39-23 во последното коло од регуларниот дел на Супер Лигата, голманот на ГРК Охрид, Бојан Блажески, кој зад своето име запиша 13 одбрани, во разговор за Спортска Мрежа, го анализираше натпреварот, завршницата од домашниот шампионат и европскиот предизвик што следува.
За мечот со Пролет
Блажески потенцира дека и покрај густиот распоред и заморот од европските обврски, смета дека тимот одговорил на високо ниво. Според него, ротациите донеле свежина, а колективната игра била клучот за убедливиот триумф.
„Вечерва го одигравме последниот натпревар од регуларниот дел во Супер Лигата. И покрај долгиот пат и набиениот распоред што го имавме во Февруари, денес одигравме одличен меч, со многу ротации и навистина, сите момци одиграа феноменално.“
За плеј-офот и мечот со Бутел
Регуларниот дел, Охрид го заврши на третата позиција, а Блажески смета дека досега сработеното треба да остане зад нив. Вели дека од овој момент почнува ново поглавје, во кое фокусот мора да биде максимален, почнувајќи од првиот предизвик против Бутел.
„Регуларниот дел го одигравме одлично, можеби и подобро од очекуваното. Најважно е сега да потенцирам дека тоа е зад нас и не смееме да размислуваме што било. Оттука се врти ,,нов лист” и мораме да бидеме фокусирани максимално наредните 3 месеци. Со Бутел игравме натпревар пред крајот и веќе сме добро запознаени со противникот. Сакаме ,,Play Off” фазата да ја започнеме со победа.“
За четвртфиналето во Европа
Во четвртфиналето од ЕХФ Европскиот Куп, охриѓани ќе се соочат со грчкиот Олимпијакос. Голманот признава дека станува збор за квалитетен противник, но нагласува дека во моментов, приоритет е домашниот шампионат и стартот на плеј-офот.
„Во 1/4 финалето на ЕХФ купот за противник го добивме Олимпијакос. Одлична екипа. Пред сè имаме слика за каков противник станува збор. Да, прерано е да се разговара на таа тема, бидејќи сега сме фокусирани на Бутел, па потоа ни гостува Акалоид . Според мене, нема да кријам- можеби најважниот меч во ,,Play Off” фазата. Имаме време , веќе се спремаме, анализираме и ќе дададеме сè од себе да го израдуваме Охрид.”- вели Блажески за Спортска Мрежа.
Со јасна порака – фокус на сегашноста и чекор по чекор – Охрид влегува во најважниот дел од сезоната, со амбиции и на домашната и на европската сцена.
