Македонскиот шампион Еурофарм Пелистер освои бод на тешкото гостување кај ГОГ Гудме, ремизирајќи 28-28 во 12. коло од Лигата на шампионите. Со овој резултат битолчани остануваат во игра за осминафинале, иако шансите се сведени на теорија.
Пелистер сега има пет бода и е седмопласиран, додека данскиот тим е на девет. Во пресметката за следната фаза е и ПСЖ со осум бода, па разврската ќе зависи од резултатите во наредните две кола.
Натпреварот не почна добро за македонскиот претставник. Домаќините отворија со 4-1, а разликата порасна и на плус четири (9-5). Никола Митревски со неколку клучни интервенции спречи уште поголема негатива, но на пауза се замина со 15-11 за ГОГ.
Во вториот дел Пелистер заигра поофанзивно и полесно доаѓаше до погодоци. Пешевски намали на 23-21, а драмата кулминираше во последните десет минути. По неколку пропуштени напади на двете страни, следуваше израмнување на 24-24, а потоа и целосен пресврт со гол за 25-24 во корист на битолчани.
Сепак, данскиот тим возврати преку Лике и повторно поведе. Во финишот Граховац донесе ново реми (28-28), по што домаќините имаа последен напад. По ВАР проверка беше досуден само удар од девет метри, кој заврши во блокот – за конечна поделба на бодовите.
Митревски мечот го заврши со 13 одбрани, Видомски беше најефикасен со седум гола, а по шест додадоа Граховац и Кузмановски. Кај ГОГ, Митун постигна седум погодоци.
Следниот предизвик за Пелистер е домашниот дуел против ПСЖ на 4 март – меч што може да ја одреди целата европска судбина на битолчани.
