Пролетниот дел од Втората лига донесе многу погодоци и високи победи, иако првите 45 минути не гарантираа погодоци на натпреварите, во вториот дел ефикасноста се зголеми.
Брегалница со пораз ја започна пролетната полусезона откако во рамки на 16. коло загуби во Гевгелија од Кожуф со резултат од 2:0. По чистите мрежи во првиот дел, стартот на вториот дел донесе два погодоци за домаќинот и вредни три бодови.
Томица Петров во 55. минута го отвори резултатот и го прослави голот кај верните „Фантоми Север“, а за поздравување беше и големиот број на публика, можеби и најголема посетеност денес имаше во однос на останатите домашни мечеви на Кожуф во тековната сезона.
Во 66. минута Давид Ивановски имаше своја шанса која ја претвори во гол за конечни 2:0 и големо славје на фудбалерите на Кожуф.
Тетекс со победа од 2:0 го доби Вардар Неготино во дербито за опстанок преку бараж со погодоци на Азис Јамини и Агон Елмази.
Иван Глигоров е херојот на Охрид кој беше стрелец на единствениот победнички гол во Струмица каде „рибарите“ славеа минимална, но голема победа од 0:1 над Беласица во дербито на колото.
Новаци имаше убедлив триумф на стартот на вториот дел откако ја доби Победа во Прилеп со 0:5. Стефан Јовановски беше двоен стрелец, а во првиот дел погодија и Лука Лисолајски и Христијан Драгарски за 0:4 на полувреме.
Во вториот дел тимот на Дарко Крстески стигна до победата од 0:5 преку голот на Марко Лозановски.
Осогово го слави Алпај Јусуф кој во 92. минута донесе три бода за „жетварите“ во дербито на Истокот со Каменица Саса во Кочани. Новото засилување на тимот од Кочани е херој за минимален триумф.
Детонит Плачковица убедлив на стартот од пролетниот дел откако на домашен терен со 6:0 го доби Големо Коњари. Стефан Ристовски во 41. минута го отвори резултатот, а во 44. минута Дуков погоди за 2:0 на полувреме.
Во вториот дел Христијан Сркески си постигна автогол, а до крајот на мечот Дуков погоди уште двапати за негов хет-трик, а гол постигна и Александар Смилков.
Скопје без проблеми славеше над Слога во Виница со убедливи 0:4. Резултат го отвори Амир Иса во 41. минута за 0:1 на полувреме. Во вториот дел Кристијан Николовски зголеми на 0:2, а потоа погодија новите засилувања Симеон Христов и Бесмир Даци.
Фикрет Љиварека и Зани Назифи со по два погодоци обезбедија победа од 4:1 над Преспа, а за тимот од Ресен единствен стрелец беше Александар Поповски.
