Детонит Плачковица славеше со минимални 1:0 во Кочани против Осогово, во натпревар од шестото коло во Втората лига. Победничкиот погодок за радовишани го постигна Филип Ѓорѓиевски во 77. минута, што беше доволно трите бодови да заминат во Радовиш.
Тренерот на Детонит Плачковица, Горан Здравков, за Спортска Мрежа истакна дека неговиот тим одиграл дисциплиниран и квалитетен натпревар, во кој еден гол го решил победникот.
„Одиграме доста добар натпревар, дисциплиниран, сите фудбалери дадоа свој придонес во оваа важна победа за нас. Бевме доминантни во текот на сите 90 минути, имавме одлично судење кое што морам пофалам. Едноставно ја заслуживме победата. Натпреварот го одлучи само еден гол, иако имавме уште три до четири сто процентни шанси, противникот исто имаше свои моменти во текот на натпреварот, кои што не ги искористи. Сакам да се заблагодарам за гостопримството од страна на домаќинот – Осогово, а ние продолжуваме понатаму да се сконцентрираме и фокусираме на наредните натпревари“, ни изјави Здравков.
Стратегот се заблагодари на своите играчи за максималниот ангажман и посочи дека клуч за победата била стрпливоста.
„Честитки до сите момци кои изгинаа на теренот, главна одлика на натпреварот во Кочани ни беше стрпливоста, имаме потенцијал и квалитет во нашиот тим“, додаде Здравков за Спортска Мрежа.
Во следното коло Детонит Плачковица ќе го пречека тимот на Победа, додека Осогово ќе игра регионално дерби против Слога во Виница.
