Утре ќе бидат одиграни натпреварите од четвртото коло на Третата македонска фудбалска лига – Исток, а веќе се познати и судиите кои ќе ја делат правдата.
Четвртата рунда го носи дербито во Валандово меѓу Победа и Овче Поле, а правдата ќе ја дели Тоше Џамов од Кочани, а негови помошници ќе бидат Игорче Богатинов и Петар Михаилов од Кочани.
Во Струмица локално дерби на Тиверија и некогашниот прволигаш Хоризонт Турново, а правдата ќе ја дели судиска тројка од Струмица. Главен судија ќе биде Блаже Јанев, а ќе му помагаат Панче Пецев и Александар Митев.
Правдата на натпреварот меѓу Карбинци и Дојранско Езеро ќе ја дели Борче Коцев од Радовиш, а негови помошници ќе му бидат Марио Кочијев од Штип и Тодор Апостолов од Зрновци.
Брегалница во Делчево ќе биде домаќин на Рудар, а правда ќе ја дели судиска тројка од Штип на чело со Иван Јанев и неговите помошници Игор Филипов и Цане Давитков.
Во Пирава ќе се соочат екипите на Ударник и Светлост од Зрновци, а за правдата ќе бидат задолжени Блаже Петковски од Миравци како главен судија и неговите помошници Илија Атанасов и Андон Михајлов од Гевгелија.
Сите натпревари ќе започнат во 15 часот, а во рамки на четвртото коло слободна ќе биде екипата на Малеш од Берово.
