Тотален хаос на стартот од новата сезона, вечерва наместо со три натпревари да започне новата сезона од Втората футсал лига, истата започна со само еден меч, двата не се одиграа поради тоа што во сала екипите се појавиле со недоволен фонд на играчи.
Во новата сезона учество пријавија 13 екипи, но како тргнало уште од првото воведно коло ќе видиме колку од нив ќе ја доиграат сезоната.
Битолски Конзули натпреварот со ланскиот прволигаш Овче Поле од Свети Николе, наместо да го одигра во Битола, реши да го игра во Свети Николе, во спортската сала „Цар Самоил“ каде практично Овче Поле ги игра домашните натпревари со што во тој случај Конзули на гостински терен е домаќин, а Овче Поле на домашен терен е формален гостин. Но, иако така беше пријавен натпревар, истиот сепак не се одигра, бидејќи екипата на Конзули пристигнала со тројца играчи, со што натпреварот и не започна, за што е наведено и во официјалниот записник од натпреварот.
„Бидејќи екипата на Конзули пристигна со тројца играчи, натпреварот не започна“, се вели во делот за примедби од официјалниот записник на мечот.
Ниту натпреварот во Дебар не се одигра меѓу Кораби и Партизан Југ Брвеница, бидејќи гостинската екипа по чекање од половина час на теренот се појавила само со двајца фудбалери.
„По чекање од повеќе од половина час од гостинската екипа се појавија само двајца фудбалери во сала. Во салата присутни сите службени лица на натпреварот“, се вели во делот за примедби од официјалниот записник на натпреварот.
Според ваквите состојби екипите на Кораби и Овче Поле треба да имаат службени победи и службени три бодови.
На единствениот меч одигран вечерва од првото воведно коло од Втората футсал лига екипата на Балкан обезбеди победа од 3:6 над домаќнот ССК.
На полувреме резултатот беше 2:4 за гостинот, со што за домашниот тим стрелци беа Илија Алексовски, Дарко Стевковски во првиот дел и Дамјан Ѓуровски во вториот дел. За гостинската екипа Пајтим Реџепи и Ибрахим Алији беа двојни стрелци во првиот дел, а во второто полувреме погодија Џељал Мајку и Кадар Амза.
Утре Победа на домашен терен ќе игра со ланскиот прволигаш Карадаку, во Штип ќе играат Мал Ајакс со Кратово, додека пак колото ќе се затвори во понеделник со мечот меѓу Енхалон и СЕЕ Университи во Струга. Во првото коло слободна е екипата на Каршиака.
