Висока победа за Овче Поле, трите бодови останаа во Битола, ССК Скопје ја доби голеадата со Фудбал Старс

Поранешниот прволигаш Овче Поле вечерва на домашен терен со „лото“ победа од 7:1 го декласираше „фенерџијата“ Карадаку во рамки на 8. коло на Втората футсал лига.

Со погодоците на Лука Наумов и Аки Мемедалиев домаќинот имаше 2:0 на полувреме, а во вториот дел постигна уште пет гола преку Климент Ѓошев, Икица Јованов, Роберто Андонов и Марио Јанев кој беше двоен стрелец.

За гостинскиот тим Зејнула Мустафи беше единствен стрелец, кој постигна утешен гол за неговиот тим кој одново се соочи со висок пораз.

ССК Скопје ја доби голеадата со Фудбал Старс откако славеше домашна победа од 9:7. Снатијаго Ариф и Спасе Здравевски постигнаа по три гола за домашниот тим, а пак Бранко Ѓуровски беше двоен стрелец, а еден гол постигна Несим Сулејман.

За тимот од Кочани со три гола се истакна Драган Трајчов, Давид Тренчев имаше два гола, а пак по еден гол постигнаа Драган Гаврилов и Христијан Крстов.

Трите бодови вечерва останаа во Битола откако Конзули со 6:4 го доби Кратово. Двојни стрелци за домашниот состав беа Темур Емини и Марјан Јовановски, а по еден гол постигнаа Игор Скепаровски и Аднан Агушевски.

За тимот на Кратово во првиот дел стрелаа Димитар Стојановски и Дамјан Ивановски, а во вториот дел погодија Горан Арсовски и Давид Стојановски.

Вчера, СЕЕ Университи прв го победи лидерот Железарец, а висока победа забележа Црна Река над Партизан Југ, извештајот за овие натпревари можете да го прочитате овде.