Двајца од тројцата македонски претставници во третото по квалитет европско клупско натпреварување, Челинџ купот, сезонава ќе дебитираат на меѓународната сцена, а Европската одбојкарска конфедерација во договор со клубовите ги утврди термините за одигрување на натпреварите.
Освојувачот на Купот 2025 кај мажите, УГД Штип, својата европска премиера ќе ја има на 12 ноември, кога ќе гостува кај Кол ИЛ во салата „Крингсјахале“ во Осло од 19 часот. Реваншот е закажан за 19 ноември, од 19 часот, во салата „25 Мај“ во Радовиш, каде УГД Штип ќе го пречека норвешкиот претставник.
Наковски Волеј, пак, ќе дебитира на европско тло на 29 октомври во 18 часот во салата „Варенска“ во Острава, со меч против чешкиот ривал ТЈ Острава во првото коло од Челинџ купот. Возвратниот дуел ќе се одигра на 5 ноември од 19 часот во СЦ „Парк“ во Струмица.
За разлика од машките екипи, одбојкарките на Работнички Скопје ќе ги одиграат двата натпревари на гостински терен во Естонија. Според договорот со противникот РАЕ Спортдикол, првиот меч ќе се игра на 4 ноември во 18 часот, а вториот ден подоцна, во истиот термин, во салата „Рае Спортдикомплекс“ во Јури.
