Викендов во Сјеница, Србија се одржа Летниот регионален куп во биатлон, на кој учество зедоа екипи од Македонија, Србија, Грција, Босна и Херцеговина, Бугарија и Либан.
Нашите биатлонци остварија одличен настап и се закитија со вкупно пет медали на натпреварите во дисциплините спринт и скратен индивидуал. Во сениорска конкуренција Павле Коруноски двапати се искачи на победничкиот подиум освојувајќи две бронзи. Кај јуниорите, Благоја Најденоски освои сребро и бронза, додека во најсилната конкуренција на помладите јуниори, Петар Гиноски се закити со сребрен медал.
Солидни резултати постигна и Тео Петрушу, кој во спринтот заврши на петтото место, а добри настапи забележаа и младите репрезентативци Душан Божиноски, Александар Јорданоски и Илија Христоски. Нардени натпревари од регионалниот куп ќе бидат во Романија од 18 до 21 Септември.
Со овие резултати, македонските биатлонци уште еднаш потврдија дека успешно се натпреваруваат на регионално ниво и имаат потенцијал за уште поголеми достигнувања во иднина.
