Беласица му оддаде големо признание на живата играчка легенда Петар Андреев пред натпреварот меѓу Беласица и Детонит Плачковица, од 4. коло на Втората лига, кој струмичани го добија со 1:0.
Целиот стадион, целата публика стана и му се поклони на Андреев, кој за Беласица одигра 555 натпревари низ рекордни 22 сезони, постигнувајќи 50 погодоци со што се вбројува меѓу најдобрите стрелци во историјата на клубот.
Андреев доби пригодни подароци од претседателот на клубот, Славчо Васков – Пинда за неговата импресивна кариера во дресот на струмичката фудбалска гордост.
„Човекот кој остави најголем траг во Беласица со 555 натпревари во 22 сезони, Петар Андреев претставува пример за денешните генерации каква треба да биде љубовта кон сопствениот клуб. Тој денес со големи овации беше поздравен од струмичката публика која во еден глас го скандираше неговото име. Од претседателот на клубот Славчо Васков – Пинда му беше доделена плакета и врамен дрес со неговото име кое ќе му остане во вечно сеќавање“, се вели во соопштението на клубот.
