Се комплетира второто коло во Првата женска фудбалска лига со натпреварот во Струмица, каде домаќинот Тиверија Брера рутински и убедливо со 4:0 го совлада дебитантот Вардар, кој запиша нов пораз.
Резултатот беше отворен уште во 15. минута со голот на Данче Карпизовска, а само осум минути подоцна, од белата точка, Теона Галабовска зголеми на 2:0, резултат со кој се замина на полувреме.
Во вториот дел голманката и капитенка на домаќините Викторија Панчурова речиси и немаше работа, бидејќи вардарки не упатија ниту еден посериозен удар кон нејзиниот гол.
Стефанија Божинова во 71. минута погоди за 3:0, а само седум минути подоцна Ивана Илиева ја затресе мрежата за конечни 4:0. Голманката на Вардар, Халиме Имери, повторно капитулираше.
И покрај новите интернационални засилувања, Вардар сè уште не успева да стигне до прва победа и ќе мора да причека и за првите сезонски бодови.
