Беласица ја оствари својата најубедлива победа сезонава, совладувајќи го тимот на Големо Коњари со високи 1:7 во рамките на третото коло од Втората македонска лига. Новото засилување Бојан Спиркоски блесна со хет-трик, а струмичани уште еднаш потврдија дека се еден од главните фаворити за највисок пласман.
По натпреварот, тренерот Александар Стојанов за Спортска Мрежа го изрази своето задоволство од изданието на своите избраници.
„Прво честитки за сите актери денес, најголемите честитки одат кон моите играчи. Фаворитската улога ја знаевме, но јас сум тренер кој секој противник го почитувам, а и цела недела работевме психолошки затоа што однапред добиените натпревари се најтешки. Само првите 30 минути според мене беа тешки односно не бевме на посакуваното ниво, некако бевме брзоплети во организацијата затоа што сакавме што побрзо да постигнеме гол. Дадовме гол и за брзо противникот се врати но пред полувремето влеговме во предност, а веќе на полувремето направивме некои корекции и второто полувреме беше вистинското како треба Беласица да изгледа“, изјави Стојанов за Спортска Мрежа
Стојанов откри дека овој дуел бил искористен и за ротирање на составот, давајќи шанса на повеќе играчи.
„Па кажав и претходно дека секој натпревар е важен и на секој натпревар треба максимално да се влезе, а и од тренерски аспект екипата која постигнала успех претходно не треба да се менува, инаку од претходниот натпревар со Скопје имаше само 2 измени во составот поради ситни повреди кај одредени играчи. Да напоменам дека во второто полувреме добија шанса повеќе играчи каде исто така и тие дадоа целосен допринос во конечниот резултат“, дополнува искусниот стратег Александар Стојанов во изјавата за Спортска Мрежа
Со оваа победа, Беласица ја потврди својата одлична форма и испрати јасна порака дека оваа сезона сериозно атакува на врвот на табелата.
