Со вчерашната победа во полуфиналето на ИТФ турнирот во Слобозија, Романија, македонската тенисерка Лина Ѓорческа избори пласман во своето четврто финале оваа година. Таа ја совлада домашната тенисерка Марија Попа со 2-0 во сетови (6:1, 6:4), во меч кој траеше 86 минути.
Првиот сет Лина го доби убедливо со 6:1, откако по 1:1 во гемови направи серија од пет последователни гема за само 30 минути игра. Во вториот сет следеше поголема борба – Ѓорческа поведе со 4:2, но ривалката успеа да израмни на 4:4. Сепак, македонската тенисерка повторно ја презеде контролата и со два добиени гема го затвори сетот со 6:4 и ја осигура конечната победа.
Во финалето Ѓорческа ќе се соочи со уште една романска претставничка – Елена Бертеа, која со 2-0 во сетови (6:3, 7:6(3)) ја елиминира својата сонародничка Георгина Кракун. Финалниот меч е закажан за денес во 15 часот по македонско време.
Ова ќе биде четврто финале за Лина во 2025 година, по трите настапи во Куршумлијска Бања, Србија. Дополнително, ова е нејзин трет финален настап на последните три турнири, што е доказ за одличната форма во која се наоѓа.
