Второлигашот Кожуф од Гевгелија доби големо засилување за новата сезона. Во редовите на тимот на тренерот Иван Варадиновски пристигна искусниот прилепски фудбалер Николче Шаркоски, кој ја продолжува својата кариера во јужниот второлигаш.
31-годишниот офанзивец се раздели со Вардар откако му истече договорот, а во новата средина ќе се обиде да ја пренесе својата богата прволигашка искуственост и да му помогне на Кожуф во остварување на амбициите.
Шаркоски во Вардар пристигна во јули 2024 година, откако претходно една сезона настапуваше за Воска Спорт, а претходно двапати го носеше дресот на Работнички. Во својата кариера беше дел и од Брера Струмица, како и од Победа во периодот од 2014 до 2018 година, додека првите професионални настапи ги имаше во тимот на 11-ти Октомври од Прилеп.
Со Вардар минатата сезона го освои Купот на Македонија, а за најтрофејниот клуб одигра 15 натпревари во шампионатот и постигна еден гол, додека во Купот настапи на три меча и забележа една асистенција.
Во својата досегашна прволигашка кариера, Шаркоски има одиграно 215 натпревари, постигнувајќи 27 голови и додавајќи 22 асистенции. Со своето искуство и квалитет, се очекува да биде значајно засилување за Кожуф во борбата за врвот на табелата.
