Министерството за спорт на Република Македонија денеска ги додели државните награди „8 Септември“ на спортските дејци кои со својата работа оставиле значителен белег во развојот и промоцијата на македонскиот спорт. Церемонијата се одржа во просториите на Собранието, каде наградите им беа врачени на заслужните спортски личности.
Највисокото признание – награда за животно дело за исклучителен придонес во развојот на спортот и афирмацијата на земјата на меѓународната сцена, му беше доделено на Јошко Миленкоски. Актуелниот селектор на македонската одбојкарска репрезентација е поранешен врвен одбојкар, универзитетски професор и долгогодишен тренер со богато домашно и меѓународно искуство. Наградата му ја врачи министерот за спорт, Борко Ристовски.
Покрај Миленкоски, државната награда „8 Септември“ и плакети добија уште четворица заслужни спортисти:
-
поранешниот борец и спортски работник Хамид Бакија,
-
поранешниот истакнат фудбалски судија Зоран Николовски,
-
спортскиот доктор кој повеќе од четири децении работеше во македонската кошарка, Виктор Тевчев,
-
и спортскиот новинар со над шест децении искуство, Кирил Манев.
Со ова признание, Министерството за спорт ја потврдува својата посветеност кон вреднувањето на луѓето кои го градат македонскиот спорт и оставиле траен печат во неговата историја.
