Женскиот одбојкарски прволигаш Пелистер Волеј од Битола продолжува амбициозно да го оформува својот ростер за новата сезона во македонската Суперлига. Ново име во редовите на битолскиот клуб е белоруската техничарка Алина Жевлакова, која во Македонија доаѓа по настапите за албанскиот прволигаш Поградец.
Жевлакова има богато интернационално искуство и доаѓа од градот Мозир во Белорусија, каде што настапувала за тимот Жемчужина Полесја, освојувајќи златен, сребрен и бронзен медал во националниот шампионат и купот. Во сезоната 2023/24 беше дел од Атлант Барановичи, а минатата сезона ја заврши како бронзена медалистка во албанската Суперлига со тимот на Поградец.
Од клубот информираат дека преговорите со одбојкарката траеле речиси три месеци, но нејзината посветеност, енергија и борбеност биле клучните карактеристики што го натерале Пелистер да ја ангажира. Со оваа аквизиција, клубот дополнително го зацврстува својот суперлигашки идентитет.
Жевлакова е четвртото засилување на Пелистер Волеј ова лето, по ангажманот на американката Шиник МекГи и македонските одбојкарки Симона Стојановска и Ева Трпеновска. Клубот најавува дека засилувањата не запираат тука и наскоро ќе следуваат нови имиња во битолскиот состав.
